Leikmenn og þjálfari Þórs brutu lög gegn veðmálaauglýsingum þegar þeir komu fram í viðtölum eftir sigur liðsins á Grindavík í Lengjudeildinni á föstudag en þeir voru allir með derhúfu merkta veðmálafyrirtækinu Coolbet.
Klara Bjartmarz, framkvæmdastjóri KSÍ, segir í viðtali við Vísi að mál sé til skoðunar hjá sambandinu. Eitt af því sem kemur til greina er að Klara vísi málinu til aga- og úrskurðarnefndar á þeim forsendum að það hafi skaðað ímynd knattspyrnunnar.
„Það er eitt af því sem við erum að skoða. Ég held að það séu nú engin fordæmi fyrir máli sem þessu svo við erum að skoða reglugerðir sambandsins og slíkt, til að átta okkur á hvernig þetta mál snýr. Þetta lítur út fyrir að vera brot á landslögum,“ segir Klara við Vísi.
Íslenskar getraunir keyptu á dögunum nafnaréttinn á 1. deildinni og deildin heitir í dag Lengjudeildin. Birgir Jóhannsson, framkvæmdastjóri ÍTF, segir að ekki sé um samningsbrot að ræða en hins vegar fordæmir ÍTF hegðun Þórsara.
„Þetta er kannski ekki samningsbrot, því það er bara ólöglegt í landinu að auglýsa erlendar veðmálasíður. Maður býr ekki til samning og reiknar með því að menn brjóti landslög. Þetta hefur því ekki áhrif á samninginn sem slíkan, en það er óheppilegt að svona komi upp í fyrstu umferð. Við fordæmum þetta, og þetta er ekki það sem ÍTF stendur fyrir,“ segir Birgir við Vísi.
Óðinn Svan Óðinsson, formaður knattspyrnudeildar Þórs, baðst undan viðtali við Vísi í morgun og sagði Þórsara ætla að ræða saman síðar í dag.
Nenhum comentário:
Postar um comentário